As mulleres que compoñen o grupo de goberno da Deputación de Pontevedra secundarán este xoves 8 de marzo a folga feminista convocada a nivel internacional, coincidindo co Día Internacional da Muller.
"Hai razóns máis que suficientes para facela", sinalou a presidenta provincial, Carmela Silva, no transcurso da inauguración da exposición 'Rompe, xoga en igualdade' na sede da institución.
"Todas as deputadas provinciais mañán faremos a folga de 24 horas e ademais imos renunciar ao noso salario, porque as mulleres de outras actividades que fan folga tamén renuncian, llo van a descontar, e nós queremos ser como o resto das mulleres", completou no seu discurso.
Tamén a deputada Eva Villaverde explicou a decisión lembrando ás mulleres que ao longo dos anos loitaron polos seus dereitos e pola igualdade. "Por todas elas, as que estamos, as que non estarán e as que estiveron as mulleres deste goberno provincial estaremos en folga", argumentou.
Ademais de Carmela Silva e Eva Villaverde secundarán a protesta do 8 de marzo as deputadas Isaura Abelairas, Chelo Besada, Monserrat Magallanes e Digna Rivas.
A folga, convocada baixo o lema "Se nós paramos, para o mundo", pretende reivindicar a necesidade de avanzar cara á igualdade real das mulleres e os homes.