As residencias de maiores da área sanitaria de Pontevedra e O Salnés teñen nestes momentos 47 usuarios con positivo en covid-19.
Así consta no último boletín oficial facilitado pola Xunta de Galicia, que recolle que a residencia máis afectada é a Divina Pastora de Vilagarcía de Arousa, con 30 usuarios contaxiados este mércores.
Ademais, hai 4 usuarios da residencia de Marín e 13 do centro DomusVi de Ribadumia.
CRIBADOS DE ANTÍXENOS
En canto á incidencia da pandemia na área sanitaria, o Sergas fixo público este mércores o dato da actividade dos puntos de cribados con test de antíxenos activos en Pontevedra, Vilagarcía, Sanxenxo, Caldas e Marín, nos que se detectou entre o luns e o martes un total de 81 positivos.
Segundo a información oficial, realizáronse nos cinco puntos 889 probas e o 9% foron positivas.
O punto con máis probas é o que está no auditorio de Vilagarcía, no que se realizaron 310 test e deron positivo o 8%, un total de 25 persoas.
A taxa de positividade máis elevada foi a de Marín, do 14%. Acudiron facer a proba 114 persoas e houbo 18 positivos.
En Pontevedra realizáronse 209 test entre o luns e o martes e houbo 23 positivos, o 11%.
En Sanxenxo e Caldas a porcentaxe de positivos baixa. Na sala Nauta de Sanxenxo realizáronse 127 e deron positivo 9, o 7%, mentres que na Tafona de Caldas detectáronse 6 positivos en 114 probas, o 5%.
POUCA AFLUENCIA EN MARÍN
En Marín, segundo a información facilitada polo Concello, o cribado do Museo Manuel Torres realizou desde que se puxo en marcha o pasado 10 de xaneiro ata o día 16 un total de 1.331 tests, nos que se detectaron 89 positivos.
A alcaldesa, María Ramallo, explica que nos primeiros días houbo unha elevada afluencia de persoas que foron facer unha proba, pero houbo un lixeiro descenso nos últimos días e lembra a toda a poboación de Marín e da contorna que este cribado segue aberto e dispoñible.
Tamén houbo persoas que, a pesar de pedir a autocita, non acudiron ao cribado, xa que a contabilización indica que se citou a 1.648 persoas, de maneira que 317 persoas que pediron cita non acudiron.
De momento, pode seguirse solicitando unha cita para estes cribados nas cinco localidades a través da web coronavirus.sergas.gal/cribado/. O servizo está dispoñible de luns a domingo, de 8.30 a 13.40 e de 15.30 a 20.40 horas.