A Policía Nacional informou este mércores das accións que teñen en marcha para fomentar a seguridade e a convivencia nos centros de secundaria e formación profesional de Pontevedra.
A delegación de Participación Cidadá e axentes da Brigada de Seguridade Cidadá da Comisaría de Pontevedra, Vilagarcía e Marín realizan as vixilancias en centros escolares a diario.
É o que se coñece como plan cirector para a convivencia e mellora da seguridade que contempla a intensificación da vixilancia tanto nos centros educativos como en rúas, zonas e áreas adxacentes, especialmente nos de Educación Secundaria e Bacharelato, así como aqueloutros cuxa problemática específica o aconselle, en virtude dos datos ou información obtida en fases anteriores.
Os policías poñen especial atención na detección de posibles puntos de venda de drogas, ao obxecto de conseguir a súa desarticulación, así como a detención e posta ao dispor xudicial dos responsables.
Para a realización destes servizos téñense en conta os horarios de entrada e saída dos alumnos e os períodos de recreo.
Cada semana realízanse controis aleatorios na contorna dos institutos Valle Inclán, Sánchez Cantón, Torrente Ballester, Luis Seoane, Frei Martín Sarmiento así como os institutos de Vilagarcía e Marín.
Ademais, fomentáronse as relacións entre os delegados de Participación Cidadá como coordinadores para o desenvolvemento deste plan e os equipos directivos dos centros educativos, achegando asesoría técnica e apoio policial especializado en materia de menores e de mozos en competencias como prevención de consumo de drogas, acoso escolar ou uso adecuado das redes sociais.
Engade Pontevedra Viva como fonte preferida de Google de balde
Mantente informado coas últimas noticias de actualidade.