Os centros de ensino IES Chan do Monte e o Colexio San Narciso de Marín contarán a partir do próximo luns 14 de novembro cunha nova zona de aparcadoiro de balde.
Segundo confirmou o Concello de Marín, esa é a data na que entrará en servizo a parcela de 1.200 metros cadrados habilitada na zona, e que contará con capacidade para 50 vehículos.
Trátase dunha demanda da comunidade educativa, e é que os cursos de FP que se imparten en ambos os dous centros provocan unha afluencia considerable de coches ao poder o alumnado, pola súa idade, utlizar ese medio de transporte.
Con este novo espazo, que o venres visitou a alcaldesa María Ramallo acompañada dos directores e representantes da comunidade educativa do San Narciso e o Chan do Monte, conséguese que practicamente todos os centros educativos da vila teñan asociado un espazo público de estacionamento.