Moitas dúbidas existen sobre os plans de desescalada do Goberno en relación coa práctica de actividades deportivas, máis aló do deporte profesional e federado. O único que está claro é que a reapertura dos ximnasios e centros deportivos será progresiva e con condicións.
Segundo recolle o documento presentado polo executivo de Pedro Sánchez, os ximnasios poderán retomar a súa actividade, con certa normalidade, a partir da fase tres da desescalada. É dicir, salvo que se atrase por motivos sanitarios, non antes do 8 de xuño.
Para poder abrir, con todo, só poderán ocupar un terzo do aforo, terá que haber distancia de seguridade entre os usuarios e non se poderán usar os vestiarios ou as duchas baixo ningún concepto, aclaran desde Sanidade.
En todo caso, estes plans están suxeitos a modificacións xa que, ao ser unha das últimas actividades en retomarse, podería haber cambios nas próximas semanas.
Antes dese 8 de xuño, haberá centros deportivos que poidan ter certa actividade, pero moi limitada e en condicións prefixadas polo Goberno.
Máis aló da actividade física individual na rúa, que se permitirá a partir do próximo sábado, o plan de desescalada sinala que na fase uno, que comezará o 11 de maio, autorizarase a reapertura das instalacións deportivas ao aire libre para deportes sen contacto, entre elas pistas de atletismo, canchas de tenis ou campos de golf.
Pola súa banda, outros centros deportivos poderán recibir usuarios pero con cita previa, sen contacto entre a xente e sen utilizar os vestiarios. Desta medida, entre outros, poderían beneficiarse os que practiquen ximnasia ou algunhas artes marciais, por exemplo.
Pedir cita a un adestrador persoal ou reservar unha das máquinas, mantendo as distancias de seguridade e as medidas preventivas tamén estará autorizado. Iso si, as clases dirixidas terán que esperar un pouco máis.
Na fase dúas, prevista inicialmente para o 25 de maio, poderán abrir instalacións pechadas sen público e para deportes nas que non exista contacto ou o risco de contaxio sexa baixo.