O Recinto Feiral de Pontevedra será o punto de encontro entre Melchor, Gaspar e Baltasar co público infantil que se queira achegar na xornada do mércores para trasladar as súas peticións ás súas Maxestades.
A organización do Concello decidiu acometer este cambio debido ás previsións meteorolóxicas que anuncian choivas durante a xornada do mércores 5.
Inicialmente estaba previsto que a denominada "cabalgata estática" se desenvolvese na Praza de España onde os Reis Magos instalaríanse nos seus tronos e atenderían aos menores, que en fila, irían pasando para transmitirlles os seus desexos.
Segundo informaba a concelleira de Festas, Carme da Silva, o público que asista deberá entrar pola porta do Recinto máis próxima á avenida de Compostela. Unha vez dentro realizarase un percorrido para ver as carrozas que se atoparán instaladas no interior e, posteriormente ás súas Maxestades de Oriente. A saída realizarase pola porta máis próxima ao Pazo da Cultura.
Adoptaranse medidas de seguridade, segundo anunciou a concelleira, para que se realice unha entrada de maneira ordenada e tamén se manterá a animación no exterior e no interior do espazo, do mesmo xeito que en rúas do centro de Pontevedra.
A outra novidade atópase a rebaixa do horario previsto. Será de 11.00 a 14.00 e de 16.00 a 20.00 horas. Da Silva indicou que non quedará ningún neno sen ver aos Reis pero a intención é que ás 20.00 horas finalicen as colas e que vaian entrando os que aínda se atopen á espera.
Lembra tamén que os menores non poderán ter contacto persoal cos tres Magos por cuestións sanitarias, pero tranquilizou aos pequenos asegurándolles que despois xa visitarán as súas casas durante a noite.