A recuperación, mellora e posta en valor do núcleo tradicional do Xuviño, na parroquia de Combarro, xa leva varios días en marcha.
O concelleiro de Promoción Económica e Urbanismo, Gregorio Agís, pasou revista este mércores á obra que executa a empresa EC Casas.
O orzamento ascende a preto de 300.000 euros, que se financian a través de fondos europeos do Instituto para la Diversificación y Ahorro de la Energía (IDAE). O proxecto garante a mobilidade sostible e universal, unha maior seguridade para o tránsito peonil, ademais de seguir coa filosofía de recuperar e mellorar os núcleos tradicionais.
Nestas primeiras xornadas, os labores céntranse na dotación das tubaxes dos novos servizos básicos cos que, grazas a esta actuación, contarán as persoas residentes neste núcleo. Ao longo dos vindeiros meses tamén se actuará para reforzar a seguridade viaria e o tránsito peonil.
Se non se produce ningún contratempo estímase que os traballos estarán finalizados no segundo trimestre deste ano.
"Sen dúbida vai supoñer unha importante transformación dun dos núcleos máis emblemáticos de Combarro", sinalou Agís.