A sección cuarta da Audiencia Provincial de Pontevedra sinalou para este xoves día 3 de outubro un xuízo contra un home acusado de tentativa de homicidio e atentado.
O caso procede do Xulgado de Instrución número 2 do Porriño e refírese a uns feitos ocorridos o 3 de novembro do 2022 cando o acusado, un veciño de Vigo, recibiu a tiros aos axentes do Grupo Operativo Especial de Seguridade (GOES) que ían facer un rexistro por drogas nun taller, situado na parroquia de Chenlo.
A Fiscalía pide 11 anos de cárcere para este home polo delito de homicidio agravado en grao de tentativa xa que disparou contra un axente e unha pena de dezaoito meses polo delito de tenencia ilícita de armas.
O escrito de acusación da Fiscalía apunta que os axentes estaban correctamente identificados e que accederon ao berro de "Policía, policía!" mentres que o procesado "con evidente desprezo ao principio de autoridade" que representan os axentes "e movido polo ánimo de acabar coa súa vida", disparou contra o policía impactando o proxectil na parede que se situaba detrás "pasando a escasos centímetros da súa cabeza".
O acusado usou un revólver da marca Smith & Wesson da que non tiña a licenza precisa para a súa tenencia e uso.