A Xunta de Galicia vacinou, ata este luns, coas primeiras 18.500 doses, a algo máis de 12.000 persoas de 152 centros sociosanitarios, cumprindo o plan elaborado pola Consellería de Sanidade, segundo o cal, cada semana vacinaranse arredor de 12.200 persoas, aínda que non se descarta vacinar a máis, se se garante a chegada comprometida polo Ministerio de Sanidade.
Ata o de agora, a Xunta recibiu 37.500 doses, das que 18.550 pertencen á última remesa que chegou o pasado luns, día 4 de xaneiro.
Este martes estaba previsto vacinar a 4.715 persoas máis. Non se puido administrar ata hoxe polo tempo para adecuar a temperatura.
A previsión é rematar a vacinación da primeira dose a mediados deste mes de xaneiro.
O departamento sanitario galego mantén, polo de agora, unha reserva dun terzo das vacinas por si se produce unha rotura do stock, para garantir a administración da segunda dose.
O Servizo Galego de Saúde (Sergas) quere agradecer o excelente traballo dos equipos de vacinación, "persoal de enfermería que está a traballar cunha gran profesionalidade e unha actitude impecable".