A conselleira de Medio Ambiente da Xunta de Galicia, Ángeles Vázquez, defendeu a actuación do goberno autonómico tras detectarse a presenza de mercurio no complexo industrial de Lourizán, ocupado por ENCE.
"Teño que dicir que os parámetros están totalmente controlados e non exceden as cantidades que desde o punto de vista medioambiental poderían facer que se tivesen que tomar neste momento medidas a maiores", sinalou a conselleira.
Vázquez explicou que ENCE detectou a presenza do mineral, altamente contaminante, dentro dos "controis periódicos e exhaustivos" aos que se someten as empresas que teñen unha Autorización Ambiental Integrada e que "é o que fai que o cidadán poida estar tranquilo".
Aínda que a pasteira culpa da situación ao proceso de desmantelamento de Elnosa, autorizado pola propia Xunta e polo Ministerio de Transición Ecolóxica, o goberno autonómico afirma que se están cumprindo as medidas establecidas no mesmo con "controis que se fan día a día".
En todo caso Ángeles Vázquez mantén que "non existe a día de hoxe ningún risco, o cal non quere dicir que dende a consellería se lle instase a ENCE como a Elnosa a que sigan profundizando nos seus traballos para ver se continúa ou se vai a máis".