A Consellería de Infraestruturas, a través da Axencia Galega de Infraestruturas (AXI), realizou o pasado sábado unha recollida de datos para analizar o tráfico na contorna do areal da Lanzada co obxectivo de implantar melloras na fluidez da circulación nas xornadas de praia.
Esta análise levou a cabo usando dous drons, que sobrevoaron a zona para recoller datos sobre o funcionamento do tráfico en días nos que a contorna rexistra unha elevada afluencia debido ás visitas aos areais.
Esta tecnoloxía permitiu a obtención de imaxes precisas nos puntos conflitivos tanto nos momentos de afluencia á zona de praias como na saída das mesmas.
Este traballo, asegura a Xunta, é paralelo ao estudo de alternativas para o desdobramento da vía de alta capacidade ata O Grove.
Agora, unha vez obtida e avaliada a información, o goberno autonómico pretende decidir que medidas poderían minimizar os atascos que se producen especialmente no verán.