O Club Triatlón Poio, en colaboración co Concello de Poio, organiza o 10 de decembro a terceira edición da andaina benéfica 'Ruta dos Pobos'.
Recuperan así esta iniciativa solidaria, que non se celebra desde 2019, e para a que o prazo de inscrición xa está aberto a través da web triatlonpoio.com ou presencialmente nas oficinas municipais. O prazo para anotarse remata o 7 de decembro.
O custe da inscrición é de 1,5 euros para o seguro de accidentes, e o día da proba, durante a entrega do dorsal, cada participante doará á organización un xoguete novo ou en perfecto estado xunto a un doce de Nadal que, despois, repartirán entre as familias en situación de vulnerabilidade.
O edil de Deportes, Cándido Muíños, e o delegado da sección deportiva de atletismo do club, Juan Manuel Fernández, que presentaron esta mañá a andaina, convidaron a veciños e visitantes a participar, tanto pola importancia desta iniciativa solidaria como polo grande atractivo do traxecto.
Ademais, a organización recibirá aos participantes cun chocolate quente e con rosca e, ao remate da andaina, a todos se lles entregará unha medalla como recoñecemento e agradecemento pola súa participación. Para as tres primeiras persoas que crucen a meta cos seus dorsais chequeados nos puntos de control establecidos haberá, ademais, cestas de Nadal.
A andaina está organizada en dúas categorías: non competitiva e competitiva e nos dous casos, o traxecto é o mesmo. A categoría competitiva sairá ás 9.00 horas desde A Seca, e entregarase a cada participante un plan do percorrido para que se poidan orientar durante a carreira. Todos e cada un dos participantes da andaina competitiva deberán facer check-in nun mínimo de puntos de control ao longo do traxecto.
A andaina non competitiva sairá unha hora máis tarde, ás 10.00h, e terá o percorrido marcado e con seguimento da organización.
En ámbolos dous casos, haberá punto de avituallamento durante a andaina.
A idade mínima para anotarse é 5 anos, e ata os 12 anos deberán ir acompañados dos seus pais ou titores. Tamén poden participar mascotas, sempre e cando cumpran cos protocolos actuais de benestar animal.