A sección cuarta da Audiencia Provincial de Pontevedra absolveu do delito contra a saúde pública do que estaba acusada a unha muller que depositou no centro penal da Lama un pantalón de chándal entre cuxas costuras se atoparon dous envoltorios de plástico que contiñan 0,182 gramos de cocaína.
O tribunal destaca que "non consta nin grao de riqueza nin valor da cocaína que foi intervida polos funcionarios de prisións".
As maxistradas da sección cuarta salientan na súa sentenza que é “criterio consolidado na xurisprudencia do Tribunal Supremo” que, nos casos nos que a cantidade de cocaína intervida é tan reducida que non pode establecerse a súa pureza, "non pode afirmarse que a substancia ocupada constitúa o obxecto típico da acción punible".
A Fiscalía solicitaba unha condena de dous anos de prisión e multa de 20 euros.
O xuízo celebrouse este martes 18 de abril. Contra o fallo cabe presentar recurso.