O paro volveu a subir no mes de agosto no concello de Pontevedra ao sumar 146 persoas nos rexistros oficiais de demandantes de emprego. Deste xeito a cifra total de desempregados rexistrados no Servizo Público de Emprego na cidade do Lérez é de 5.938 persoas.
Na comarca tamén o número de parados outros concellos como Poio (43), Barro (16), Vilaboa (3) ou A Lama (1) mentres que se reduciu lixeiramente en Campo Lameiro (-7), Cerdedo-Cotobade (-6) ou Ponte Caldelas (-6).
Na comarca do Salnés-Arousa resulta rechamante o dato de Vilagarcía onde o paro reduciuse en 86 persoas no mes de agosto, do mesmo xeito que ocorreu no Grove (-17), Ribadumia (-13), A Illa de Arousa (-12) ou Cambados (-9). Pola contra, incrementouse o número de desempregados en Meis (7), Meaño (6), Vilanova de Arousa (4) e en Sanxenxo (3).
Son tamén negativos os datos de Marín, con 53 desempregados máis en agosto, e en Bueu, con 17.
Nos concellos do Umia, Caldas de Reis viu como o número de parados incrementouse en agosto en 6 persoas mentres que baixaron os desempregados en Portas (-5), Cuntis (-4) ou Moraña (-4).
PROVINCIA
Aumenta a cifra de desempregados durante o mes de agosto deste 2020 marcado pola crise económica derivada da pandemia. Tanto en Galicia como na provincia de Pontevedra obsérvase un incremento do número de desempregados principalmente no sector servizos e na industria, segundo os datos publicados polo Ministerio de Traballo e Economía Social.
Desta forma na Comunidade contabilízanse 176.951 persoas sen emprego, 1.640 máis que no mes de xullo deste ano e 23.131 máis que hai un ano nestas mesmas datas, o que supón un incremento do 15,04%.
Por provincias, as oficinas do SEPE rexistran 428 desempregados máis en Pontevedra que establece a cifra do paro en 67.421 persoas; na Coruña sumáronse 1.019 máis ás listas que en xullo; 135 máis en Ourense e 58 en Lugo.
Por sectores en Galicia, obsérvase unha mellora na construción onde diminuíu a situación de desemprego en 138 persoas. Con todo, os servizos rexistran 633 parados máis; a industria suma 417 e aquelas persoas sen emprego anterior que figuran agora no paro son 732 máis que no mes de xullo.
Dentro da provincia de Pontevedra, 136 perderon o seu emprego no sector servizos nun ano onde o descenso do turismo foi notable provocando unha situación preocupante neste sector.