Xa están a chegar ao seu destino. Foron 14 etapas duras, pero os sete hostaleiros de Pontevedra, Marín e Poio que emprenderon a viaxe desde o concello de Pontevedra ata a capital de España afirman estar "esgotados pero ilusionados".
Este domingo, estes integrantes de Hoempo percorreron o tramo entre Colado Villalba e Madrid onde este luns 21 protagonizarán a manifestación que comezará diante da Facultade de Estatística da Universidade Complutense de Madrid e marchará ata o Congreso dos Deputados. Unha marcha á que convidan a participar a toda a poboación e en especial ao sector da hostalería que está a vivir estes momentos tan complicados de crise económica.
O denominado 'Equipo Rescate Hostalería' recibiu numerosas mostras de apoio e recoñecemento. Entre eles atópase A.U.P.A. (Autónomos Unidos Para Actuar), que tamén anunciaron a súa participación na manifestación deste luns e alerta de que máis de medio millón de pequenas e medianas empresas destruiranse #ante a actual situación coas consecuentes perdas de postos de traballo. O obxectivo é que se mostre a unión de todas as persoas afectadas polas limitacións ao sector hostaleiro.
Os representantes de Hoempo tamén manterán un encontro con Rafael Simancas, secretario xeral do Grupo Socialista no Congreso dos Deputados, despois de que Guillermo Meijón, deputado do PSOE por Pontevedra, xestionase a entrevista. Tamén manterán reunións con outras forzas do Estado, segundo indican desde o colectivo
Os membros do Equipo Rescate Hostalería diríxense aos políticos para lembrarlles as súas reivindicacións. Afirman que queren axudas reais e directas, sen letra pequena; supresión de impostos mentres permanezan pechados os seus negocios; exención da Seguridade Social mentres non poidan desenvolver a súa actividade; un ERTE único para que os seus empregados sufran as menores consecuencias posibles e que se deixe de criminalizar ao sector. Neste sentido afirman sentirse "ofendidos e burlados" coa publicación do último vídeo da Xunta de Galicia, no que, aseguran, dáse a entender que todos os contaxios de COVID19 prodúcense nos bares e restaurantes.