A Policía Local de Pontevedra detivo un home que, tras provocar varios altercados polas rúas do centro histórico da cidade, acabou agredindo un dos axentes que acudiu en resposta a eses incidentes.
Os feitos producíronse na madrugada do pasado mércores 15 de xullo.
Sobre as dúas da madrugada, unha patrulla policial acudiu á Rúa Isabel II, onde segundo as chamadas de alerta, un home agredira a outra persoa.
Varias testemuñas explicaron aos axentes que este individuo, baixo os efectos do alcol ou das drogas, causara altercados na rúa e pegara a varios viandantes.
Esta persoa, segundo informa a Policía Local, seguía na zona e mantivo en todo momento un comportamento desafiante cos axentes.
Así, durante o proceso de identificación, esta persoa deitouse no chan mentres profería insultos contra os policías.
Para evitar máis incidentes, os axentes decidiron acompañalo até a súa casa.
Pero cando o coche policial iniciou a marcha para continuar patrullando, o home botouse sobre o capó e, tras ser retirado do coche, deitouse de novo no chan para obstaculizar o paso do vehículo.
Ademais, propinou varias patadas, alcanzando un dos axentes na coxa dereita.
Ante esta situación, a Policía Local procedeu á súa detención por un delito de atentado contra un axente da autoridade e será sancionado pola vía administrativa polos insultos dirixidos aos integrantes da patrulla.
Engade Pontevedra Viva como fonte preferida de Google de balde
Mantente informado coas últimas noticias de actualidade.