A Plataforma pola Defensa do Centro de Saúde de Seixo denuncia que o centro de saúde de Marín "non terá médico na quenda de tarde", unha situación que afectará a 4.000 veciños e veciñas durante todo o verán.
Desde a plataforma, que agrupa a 21 colectivos das parroquias de Santomé de Piñeiro, O Campo, Ardán e Seixo, en Marín, explican que neste centro de saúde había tres médicos que pasaban consulta na quenda de tarde e 11 na quenda de mañá, o que significaba que había 14 médicos de cabeceira.
Agora, haberá seis menos porque o centro comezou xullo cunha xubilación, 1 baixa e 4 facultativos de vacacións sen cubrir.
A plataforma atribúe esta situación á "política de non cubrir permisos, baixas nin vacacións" do Servizo Galego de Saúde, que "está a levar a un deterioro moi grave na sanidade marinense".
Segundo denuncian, elimináronse tres médicos da quenda de tarde e pasáronos para a mañá, repartindo os cupos de pacientes sen médico da mañá entre os facultativos existentes, o que vai aumentar o tempo de espera para unha cita. En total, segundo os cálculos da plataforma, entre o 1 de xullo e o 15 de setembro, 4.000 persoas que escolleran a quenda de tarde no centro de saúde de Marín quedan sen ela.
A situación tampouco é boa en Seixo, pois, segundo alertan, "hai previsión de que nos deixen 1 médico para 2.200 persoas e a poboación turista" e, ademais, o vindeiro mércores 6 de xullo haberá ningún médico e o centro quedará tan só cun enfermeiro e unha administrativa.
Dende a Plataforma lamentan que despois dun ano de protestas e denuncias, a alcaldesa de Marín, María Ramallo, e o seu goberno "sigan ignorando os problemas sanitarios da veciñanza" e anuncian que "se estes recortes non se rectifican, haberá máis protestas".