O Proyecto de Lei Orgánica de eficiencia do Servizo Público de Xustiza podería pór en risco un dos alicerces da eficacia na loita contra o narcotráfico en Galicia, a xestión dos bens incautados.
Así o alertan o Colexio de Procuradores da Coruña e a Fundación Galega contra o Narcotráfico nun comunicado conxunto.
Apuntan que esta reforma legal podería "desbaratar" a prestación do Servizo de Xestión de Bens intervidos ao Narcotráfico (SGB) que desde 2014, e de forma pioneira en España, realizan conxuntamente as dúas institucións.
Inclúe unha modificación nunha disposición que, na práctica, impediría ao Colexio e á Fundación xestionar e poxar os bens incautados ao narcotráfico, imposibilitando a prestación dun servizo que indican que é "especialmente valorado polas unidades policiais e xudiciais de Galicia", co que contribúen e colaboran eficazmente na loita contra o crime organizado.
En opinión de ambas as dúas entidades, esta reforma legal suporía "un grave retroceso" na loita contra o narcotráfico, posto que "dificulta -cando non impide- e retarda" a venda dos bens mobles intervidos.
Isto ocorre, segundo explican, porque quedaría só como canle de venda a poxa xudicial a través do Boletín Oficial do Estado.
O decano do Colexio de Procuradores da Coruña, Javier Carlos Sánchez, e o presidente da FGCN, Manuel Couceiro, remitiron unha carta ao secretario de Estado de Xustiza, Manuel Olmedo, e a todos os grupos parlamentarios expresando a súa "preocupación" .
Solicitan que se "deixe sen efecto" esa disposición na redacción definitiva da lei.