11.30 da mañá. Hora do recreo e apenas se nota a presenza de alumnos na avenida de Montero Ríos. Só hai un grupo de cinco escolares dándolle patadas a un balón e unhas mozas sentadas nunha escaleira. Elas sinalan que a folga contra a LOMCE e a reválida está a ter un amplo seguimento. "Case non había ninguén en clase", aseguran. Así é, no IES Valle Inclán, o seguimento desta xornada de protesta contou co apoio de máis dun 70% do alumnado, segundo manifestou a directora do centro. Sobre todo a partir de terceiro da ESO.
Unha situación similar rexistrouse no resto de centros de estudo secundarios. No Sánchez Cantón, a cifra superou nos cursos de bacharelato o 90% mentres que en terceiro e cuarto da ESO rexistrábase máis dun 80% de ausencias do alumnado nas aulas. O IES Torrente Ballester tamén rexistraba datos por encima do 90% de seguimento da folga e A Xunqueira I situábase preto do 85%. O mesmo sucedía no IES Luís Seoane onde de 650 alumnos de diúrno, tan só asistiron ao redor de 60 a primeiras horas da mañá porque tiñan que realizar un exame, que non querían pospoñer.
Estes datos tamén se trasladan a outros espazos de ensino como o Centro de Tecnificación Deportiva. As aulas de terceiro da ESO quedaron sen alumnos mentres que en 4º de ESO e en Bacharelato foron ao redor da metade dos alumnos.
Todos estes datos foron remitidos polos centros á Consellería de Educación a través dun documento que tiñan que remitir. Con todo, desde o departamento de prensa da Consellería non se facilitan datos sobre a incidencia da folga xa que, segundo explicaron, trátase dunha protesta de alumnos e só ofrecen datos cando se trata de folgas convocadas polos profesores.
Durante a xornada, non se rexistraron incidentes de relevancia. Esta tarde do mércores están previstas dúas manifestacións de protesta contra a Lomce e as reválidas, a primeira será ás 18.00 horas e partirá da Peregrina, está organizada pola Plataforma polo Ensino Público. A segunda comezará ás 19.00 horas, organizada pola CIG. Tamén partirá da Peregrina.