Aludec Galvanic xa conta con licenza para iniciar a súa actividade de metalizar de pezas plásticas na parcela número 3 do Parque Empresarial da Reigosa. A autorización foi outorgada no transcurso da Xunta de Goberno del Concello de Ponte Caldelas. A empresa pretende comezar a traballar en verán, tras contar xa con todas as autorizacións ambientais.
A actividade principal da empresa é a metalización de pezas plásticas, correspondentes a pezas decorativas, emblemas e anagramas, compoñentes, para o automóbil. O proceso produtivo é o recubrimento de pezas plásticas de ABS con cromo decorativo, para o cal hai que aplicar previamente capas moi finas de metal, mediante un proceso electrolítico e químico.
Esta parcela ten unha superficie de 4.186 metros cadrados e nela a nave ocupa unha superficie de 2.573 metros cadrados, en soto, planta baixa e entreplanta. A planta soto ten unha superficie útil de 1.193,30 metros cadrados, a planta baixa 2.233 metros cadrados dedicada a nave e 210 metros cadrados destinados a oficinas, e a entreplanta ten unha superficie útil de 322 metros cadrados.
O investimento na nave, incluída a maquinaria e instalacións, é de máis de 4,3 millóns de euros.
O grupo Aludec ten tamén en construción outra nave na parcela número 1 deste polígono industrial, que linda coa parcela tres. A nave desta parcela ten unha superficie de 7.176 metros cadrados e está dedicada tamén á fabricación e montaxe de compoñentes do automóbil.
Tamén teñen previsto en 2016 iniciar a construción nesa mesma parcela dun edificio de oficinas, para trasladar dende Vigo a Ponte Caldelas as oficinas centrais e a sede social do grupo empresarial.