A asociación Amizade segue desenvolvendo o seu programa de atención integral a persoas con discapacidade, do que se benefician actualmente 134 persoas na comarca de Pontevedra.
A través desta iniciativa, a entidade ofrece actividades e servizos destinados a garantir que a autonomía persoal e social das persoas con discapacidade non se vexa limitada pola falta de apoios.
O proxecto, presentado a través da Confederación Española de Persoas con Discapacidade Física e Orgánica (COCEMFE), ten como obxectivo promover que cada participante alcance un nivel de vida o máis autónomo e independente posible.
Amizade impulsa un modelo de intervención integral, combinando actividades deportivas, de lecer e convivencia comunitaria, orientadas a fomentar a participación activa na contorna social.
A través destas accións, buscan fortalecer a autonomía persoal, mellorar o benestar físico e emocional e favorecer a inclusión na comunidade.
Ademais, o programa contempla campañas de sensibilización e servizos de información e asesoramento sobre os recursos existentes no ámbito da discapacidade, co fin de concienciar á cidadanía e aos responsables públicos sobre a importancia da igualdade de oportunidades.
"Queremos que ningunha persoa vexa limitada a súa vida por falta de apoios. A autonomía non é un privilexio, é un dereito", subliñou Paulo Fontán Torreiro, presidente de Amizade, quen destacou a relevancia de manter a continuidade destes servizos, especialmente para quen afrontan dificultades económicas ou de accesibilidade.
O proxecto forma parte do plan de prioridades de COCEMFE, financiado pola Fundación ONCE, que canaliza recursos ás entidades integrantes para garantir a sustentabilidade de iniciativas sociais e proporcionar asesoramento técnico e seguimento durante todo o proceso.