Andaina saudable pola cidade para conmemorar o Día Mundial da Cruz Vermella

Cruz Vermella Pontevedra celebraba este 8 de maio o Día Mundial da organización cunha serie de actividades que inclúen unha andaina urbana e obradoiros de primeiros auxilios para conmemorar o nacemento de Henry Dunant, fundador da organización.

O punto de encontro estableceuse na Avenida Montero Ríos, onde se instalará unha carpa informativa xunto a unha histórica ambulancia modelo 1500.

Os participantes realizaron un percorrido circular de aproximadamente 3,8 quilómetros pola cidade, que remataba no mesmo punto de inicio cunha fotografía de grupo e un obradoiro de primeiros auxilios impartido polo equipo de voluntariado de Servizos Preventivos.

A actividade chega nun momento en que a organización fixo balance do seu labor durante o último ano, no que beneficiou a máis de 26.700 persoas en toda a provincia pontevedresa, das cales 8.232 corresponden especificamente á comarca de Pontevedra.

Este traballo desenvolveuse con 925 persoas voluntarias activas (233 na comarca) e o apoio económico de máis de 21.000 socios.

Entre os datos máis destacados de 2024 figura a atención a 2.188 persoas maioresna comarca a través de proxectos como teleasistencia domiciliaria e envellecemento saudable, así como os programas de intervención social que chegaron a 4.378 beneficiarios.

Especialmente significativo foi o Plan de Emprego, que conseguiu que 343 das 436 persoas atendidas na comarca accedesen a un posto de traballo, grazas á colaboración de 158 empresas de diversos sectores.

O labor formativo tamén foi intenso, con 124 cursos impartidos a 1.154 persoas, destacando os de primeiros auxilios en centros escolares e o de "Socorrismo en espazos acuáticos naturais", que outorga un certificado de profesionalidade nivel 2.

Ademais, Cruz Vermella Xuventude traballou con 2.531 menores e mozos en programas de educación para a saúde, prevención de condutas violentas e promoción do éxito escolar, entre outros.

A organización tamén reforzou o seu compromiso medioambiental con recollidas de lixo e reforestacións para recuperar a biodiversidade, ademais de formar a 335 persoas en aforro enerxético e entregar 145 kits para axudar ás familias a reducir o seu consumo mentres coidan o planeta.