Poio xa está preparado para celebrar este sábado o Samaín de Campelo, unha tarde terrorífica organizada polo Concello de Poio e a Asociación de Mulleres Arela, coa colaboración da Deputación de Pontevedra, na que mesturarán animación, xogos, xincana do terror e a Romería Zombie, unha actuación de Nelson Quinteiro Produccións.
As actividades comezarán a partir das 18.00 horas na Praza da Granxa, e tendo en conta as previsións do tempo, decidiuse manter toda a programación que se vai desenvolver no interior da carpa, e pospoñer ao sábado 4 de novembro as actividades do exterior. Isto é a corredoira do terror, o espectáculo de lume e Performance Irrupciones Violentas.
Así, o sábado o serán zombi comezará con animación, xogos, xincana do terror e baile dos esqueletes, para dar paso ao pregón a cargo de Rafa Cabeleira, xornalista deportivo e columnista de opinión nado en Campelo.
A continuación, terá lugar a Romería Zombie, de Nelson Quinteiro Produccións, un espectáculo de variedades que dinamiza un serán de defuntos a cargo dun equipo multidisciplinar de sete artistas. Haberá pintura ao vivo, unha escenografía que se vai compoñendo en directo, un pregón desde o alén, danzas macabras, cantos de ultratumba e incluso un desfile zombi. A función está dirixida ao público infantil e familiar.
Por último, e tras entregar os premios do VI Certame de Chulas e do V concurso de microrrelatos “Misterios de Kam”, a festa terrorífica rematará coa animación e música dun DJ.
A concelleira de Cultura e Educación, Natalia Sabarís, anima a grandes e pequenos de todo o concello a pasar unha xornada zombie e de terror en Campelo, unha iniciativa que, recorda, "nace dos propios veciños e que cada ano suma máis participantes. É unha cita imprescindible, unha festa que cada vez está máis presente no calendario das familias e o mellor lugar para gozala é no Samaín de Campelo".