A concelleira de Seguridade Cidadá, Eva Vilaverde, anunciou que o peche da rúa Marqués de Riestra prolongarase até este venres debido á aparición de amianto durante os traballos de demolición do edificio incendiado a pasada semana.
Concretamente, trátase dunhas planchas de Uralita localizadas na parte traseira do edificio, o que obriga a extremar as precaucións e proceder á retirada destes elementos con traxes de protección persoal.
Ademais, a apertura do viario, prevista para este martes, non foi posible porque os técnicos tamén se atoparon con que as paredes do núcleo central da escaleira "estaban máis afectadas do que pensaban", sinalou a tenente de alcalde.
Trátase de paredes de pedra que, debido á calor provocada polo lume, "tiveron moita afectación e, por tanto, desfanse" o que obriga a demoler tamén esta parte da estrutura do inmoble.
"Non é posible entrar aínda", explicou Eva Vilaverde, porque tanto esas paredes centrais como a parte última das escaleiras "están en moi malas condicións e hai que seguir demolendo" tanto as paredes como a parte de madeira das escaleiras.
Ao longo da xornada deste mércores volverán pasar polo edificio os técnicos municipais do Servizo de Arquitectura para inspeccionar a evolución dos traballos.
Loxicamente, o desenvolvemento destes labores está condicionado por todas estas circunstancias que alteran os prazos previstos facendo que a demolición sexa moi lenta "porque hai que garantir tanto a seguridade para as persoas que están alí traballando como para a xente que pasa pola rúa", indicou a responsable de Seguridade Cidadá.
"Cada vez é máis difícil facer unha previsión", lamentou Eva Vilaverde.