Por segundo ano, Poio acolle o campo de voluntariado 'Costa Azul' organizado pola Xunta de Galicia.
Trátase dunha actividade que combina a ecolimpieza con actividades de ecoturismo e formación en economía circular, sempre desde un punto de vista de respecto especialmente polo medio mariño.
Nesta ocasión participan unha vintena de mozos e mozas de entre 18 e 30 anos procedentes de distintos puntos de España.
Nunha visita aos participantes na Senda do Laño, o alcalde Ángel Moldes e a concelleira de Xuventude, Tamara González, comprobaron como se localizaron e retiraron residuos especialmente de plástico que adoitan aparecer na costa.
Estes días os participantes no campo de voluntariado tamén actuaron noutras zonas do municipio como Lourido, Combarro, a Illa de Tambo, Chancelas ou A Seca.
Fixérono tanto a pé como no mar facendo uso de kaiaks ou táboas de pádel surf.
Moldes agradeceu o "compromiso e o esforzo" dos voluntarios durante os dez días de traballo "destinando as súas vacacións en prol do coidado do medio ambiente".
O alcalde asegurou que "a súa implicación será clave para sensibilizar a sociedade sobre a necesidade de coidar o noso litoral".