O Grupo de Desenvolvemento Rural Pontevedra Morrazo (GDR Pontevedra Morrazo) celebraba este xoves no Pazo da Cultura de Pontevedra a xunta directiva e a asemblea xeral.
Entre outros asuntos, aprobouse a Estratexia de desenvolvemento participativo (EDLP) 2023-27 que orientará os fondos europeos do Programa LEADER dos vindeiros anos no territorio.
A estratexia coordina e integra todas as accións sobre o territorio co obxectivo de promover o emprego, o crecemento, a igualdade de xénero, a inclusión social e o desenvolvemento local.
O plan de acción incorpora unha nova forma para fomentar o emprego no rural: o Bono activa rural, unha axuda destinada á creación e posta en marcha de actividades non agrícolas en zonas rurais.
No apartado de formación, afóndase na viticultura e na silvicultura sustentables.
Pola súa banda, no plan de cooperación contémplase a coordinación de catro proxectos en colaboración cos GDR de Galicia que apostan pola produción agrogandeira de carácter artesanal; a maneira cooperativa dos servizos ecosistémicos que prestan as comunidades de montes; o desenvolvemento do enoturismo ligado ás IXP vitícolas de Galicia; e a dixitalización do tecido económico local.
A estratexia tamén contempla actuacións propias do GDR no ámbito da animación e dinamización territorial, como o desenvolvemento da "Ruta dos viños oceánicos" da IXP Ribeiras do Morrazo, o proxecto "Memoria sonora" ou a campaña de sensibilización ambiental para preservar a paisaxe.