O pleno do Concello de Poio aprobou a modificación de crédito necesaria para garantir a achega municipal destinada á pavimentación da contorna do Centro Comercial A Barca, na parroquia de San Salvador.
Esta intervención realizarase a través dun convenio de colaboración coa Xunta de Galicia, administración que se encargará da licitación e execución do proxecto.
O Concello asumirá o 30% do custo total da actuación, o que supón un investimento de 68.512,64 euros. Para facer fronte a esta contía, o Goberno local utilizará fondos remanentes procedentes de baixas na adxudicación de contratos anteriores, concretamente da renovación do parque infantil de Lourido e da subministración de composteiros individuais.
A actuación proxectada abrangue o acondicionamento dos accesos e do aparcamento exterior.
Unha vez finalizada a obra, o estacionamento pasará a ter unha limitación de tempo máximo de tres horas.
Segundo recolle a proposta técnica, este sistema non requirirá de pago por parte dos usuarios e ten como finalidade regular a rotación de vehículos nunha zona de elevada actividade comercial e de servizos.
A sinatura oficial do convenio coa Xunta de Galicia, que permitirá dar inicio aos trámites administrativos da obra, está prevista para as próximas semanas.
A sesión plenaria tamén serviu para aprobar unha modificación na relación de postos de traballo (RPT).
O acordo implica a creación dunha praza de axente e a habilitación dun posto de segunda actividade para tarefas administrativas dentro do corpo da Policía Local.
Esta medida coincide coa incorporación, este mesmo 1 de abril, de dous auxiliares e un novo axente ao corpo municipal. A votación deste punto contou cos votos a favor do Goberno local e a abstención da oposición. O sindicato CSIF amosou o seu rexeitamento.
DEBATE
No transcurso do pleno, a xestión das estradas centrou parte do debate entre os grupos políticos.
O Goberno local enumerou diversas intervencións realizadas en vías e camiños de todas as parroquias, mencionando actuacións en núcleos como Esperón, Costa de Arriba, Liñares, Chancelas, Fonteiriñas ou a Banda do Río, entre outros.
A oposición criticou o estado de zonas como o Camiño Real onde, despois dun mes das obras, só se pode pasar "en piragua".
Pola súa banda, desde a alcaldía subliñouse a política de realizar investimentos en viais secundarios para garantir os servizos en zonas con menor densidade de vivendas.
A sesión plenaria pode verse na canle de Youtube do Concello de Poio.
Engade Pontevedra Viva como fonte preferida de Google de balde
Mantente informado coas últimas noticias de actualidade.