A Xunta de Goberno do Concello de Pontevedra puxo en marcha este xoves unha nova oferta de emprego público con 27 prazas.
Así o anunciou o alcalde, Miguel Anxo Fernández Lores, que confirmou que destas 27 prazas un total de 14 son para a administración xeral das que 7 prazas son en convocatoria libre e delas, tres destinaranse a persoas con discapacidade. As outras 7 prazas son de promoción interna.
De non cubrirse a promoción interna ou as prazas para persoas con discapacidade, estas pasarán á convocatoria libre.
Tamén se convocan 13 prazas de administración especial para ocupar prazas destinadas a persoas tituladas en enxeñería informática, arquitectura técnica, traballo social ou enxeñería técnica industrial.
O pasado 26 de decembro o goberno local aprobou, nunha reunión extraordinaria, a oferta de emprego público municipal, que en total supón a convocatoria de 49 novas prazas. Destas, 27 son as que hoxe se puxeron en marcha e as outras 22 correspóndense coa Policía Local, xa que nos últimos anos quedaron moitas vacantes por xubilacións.
Estas 49 prazas supoñen aproximadamente o 10% do actual persoal municipal, integrada por 493 persoas, segundo os datos facilitados polo alcalde.
Engade Pontevedra Viva como fonte preferida de Google de balde
Mantente informado coas últimas noticias de actualidade.