Os problemas de saneamento da Rúa das Camelias, no barrio de Ponte Muíños, teñen os días contados.
A Xunta de Goberno do Concello de Pontevedra aprobou este xoves o expediente de contratación das obras para mellorar a rede de rede de sumidoiros e pluviais desta rúa.
"A situación era que hai un antigo colector que se atopaba en moi mal estado, presentaba filtracións e zonas obstruídas, incluso parcialmente derruídas", explicou a portavoz do goberno local, Eva Vilaverde.
Esta problemática foi denunciada en 2023 por un cento de veciños afectados, afirmando que se rexistraban inundacións que afectaban directamente a varios edificios situados na parte máis baixa da urbanización.
Chegaron a levar ante a Valedora do Pobo as súas queixas polas inundacións sufridas cada vez que se producían circunstancias meteorolóxicas adversas.
A actuación que está prevista acometer renovará a rede mediante a instalación de novas tubaxes de PVC.
O orzamento da obra, IVE incluído, ascende a 175.191,11 euros e contará cun prazo de execución de tres meses.
"Resolverá os problemas dos edificios e as vivendas situadas na parte sur da Rúa das Camelias, alí en Ponte Muíños", afirmou Eva Vilaverde tras a Xunta de Goberno.