O mes de agosto despediuse con boas cifras no relativo ao turismo para a cidade de Pontevedra.
Segundo as cifras desveladas pola concellaría de Turismo, un total de 21.727 visitantes pasaron durante o oitavo mes do ano polas oficinas da rede municipal de información turística, o que supón un incremento do 24% con respecto ao mesmo mes do pasado ano.
A tendencia mantense cun 83% de turistas nacionais, principalmente procedentes de Madrid (22,4%) e seguidos por Andalucía (15,3%).
En canto ao turismo internacional dominaron os visitantes procedentes de Portugal (26% dos estranxeiros) seguidos de Francia (15,7%), Gran Bretaña e Alemaña (ambos os dous cun 11%).
Segundo as estatísticas recollidas pola rede de información turística, un 23,3% dos visitantes que se achegaron polos centros da Casa da Luz, Praza de España e Vialia declararon aloxarse na capital da provincia, mentres o 20% proviña de Sanxenxo.
O xeito máis común de chegada á cidade foi o coche (67%), moi por enriba do avión (13,6%) e autobús (12%).
A concellaría de Turismo destacou ademais o bo comprotamiento das visitas guiadas, cun total de 854 usuarios durante o mes de agosto, 303 persoas máis que o mes de agosto de 2013.