Asentos sostibles e de cores impresos en 3D achegan o futuro á praza de Barcelos

A praza de Barcelos de Pontevedra conta desde este mércores cun espazo expositivo aberto ao público que reúne os resultados do proxecto europeo AMBIANCE.

A iniciativa, que suma catro anos de investigación e dispón dun orzamento de 4,57 millóns de euros, experimenta nunha contorna urbana real a resistencia e funcionalidade de novos materiais sostibles deseñados para reducir ata nun 70% a pegada ambiental fronte aos produtos convencionais.

As persoas que pasen pola praza atoparán unha instalación composta por asentos de cores e de grandes dimensións fabricados mediante impresión 3D a partir de bioplásticos, paneis decorativos para construción elaborados con restos vexetais e unha superficie de herba artificial de orixe biolóxico.

O conxunto permanecerá exposto durante seis meses co obxectivo de avaliar o comportamento dos compoñentes diante do uso diario e das condicións meteorolóxicas locais.

O desenvolvemento do mobiliario urbano foi liderado polo Centro Tecnolóxico AIMEN, situado no Porriño, en colaboración coa empresa pontevedresa SETGA.

As pezas expostas confeccionáronse nas células robotizadas de AIMEN empregando un robot de case tres metros de altura. Este sistema permite fabricar elementos de ata tres metros de longo, dous de ancho e metro e medio de alto.

Elena Rodríguez, responsábel do departamento de Tecnoloxías Avanzadas de Composite de AIMEN, explicou as vantaxes técnicas deste método de traballo: "Ao ser impresión 3D é un proceso que chamamos net shape. Só empregamos o material que realmente precisamos. Non hai refugallos. E aínda que leva máis horas ca unha inxección, afórrase todo o tempo previo de deseño e fabricación de moldes".

Pola súa banda, Jesús Saavedra, director de I+D+i de SETGA, precisou que a materia prima empregada procede de fontes vexetais como a cana de azucre e a iuca, das que se extrae ácido láctico mediante procesos de fermentación.

Aínda que as estimacións actuais sitúan a vida útil destes elementos entre oito e dez anos, Saavedra aclarou que aínda non se contempla unha produción en serie, xa que a instalación de Barcelos responde a unha fase de validación tanto dos materiais coma da tecnoloxía de fabricación.

Ao remate da súa vida útil, os produtos son totalmente reciclables.

HERBA SINTÉTICA

A base sobre a que se asentan estes módulos é un céspede artificial desenvolvido pola empresa italiana Mondo.

O responsábel de I+D+i da empresa, Rubén Paños, explicou que a innovación radica no uso de polietilenos de base biolóxica e plásticos xa utilizados, no canto de recorrer ao gas natural ou petróleo para obter os filamentos.

Desde a empresa sinalan que, aínda que os custos de produción son actualmente superiores debido á novidade da tecnoloxía, as expectativas sobre a súa durabilidade son positivas e o proxecto aspira a acostumar o mercado ao uso destas alternativas.

A instalación complétase cunha cabina equipada con paneis decorativos para a construción desenvolvidos pola empresa sueca Podcomp en colaboración co instituto RISE.

Vigita Nyström, coordinadora de sustentabilidade da empresa, sinalou que estas estruturas de gran formato se fabricaron mediante moldeo por compresión empregando restos forestais e residuos agrícolas de herba, que non precisan fertilizantes nin pesticidas para a súa obtención.

O alcalde de Pontevedra, Miguel Anxo Fernández Lores, destacou a colaboración da administración local coa cesión deste espazo para realización das probas.

O rexedor salientou que o proxecto se enmarca nos obxectivos da Axenda 2030 e avanzou que, unha vez remate a fase experimental e estas solucións alcancen unha produción en serie, o Concello estudará a posibilidade de incorporar este tipo de equipamentos aos espazos públicos do municipio.

O consorcio internacional que integra o proxecto AMBIANCE está formado por dez socios pertencentes a seis países europeos: ITAINNOVA, AIMEN, CRIT, CORE Innovation Centre, Mondo, Setga, Podcomp, RECENDT, RISE e SUPSI.

As conclusións obtidas tras o semestre de exposición en Pontevedra servirán para analizar o estado de conservación dos prototipos antes de avaliar a súa posterior comercialización.