O protocolo de colaboración entre a Deputación de Pontevedra e o Ministerio de Fomento para poñer en valor 18 xacementos da provincia retomouse. Tras meses de paralización, non exentos de polémica entre ambas as administracións, resolveron o concurso convocado para a restauración e musealización dos castros, ao que optaban 26 propostas, e gañou o estudo de arquitectura AGi architects e o seu proxecto 'In Natura Veritas'.
Segundo informou o propio estudo de arquitectura, nos próximos meses realizarán o desenvolvemento do proxecto gañador, que servirá para determinar os accesos e percorridos, mobiliario e equipamento para uso público, sinalización das áreas de intervención e protección preventiva dos xacementos. Tamén procederán á creación de elementos singulares que permitan a musealización de cada castro.
Joaquín Pérez-Goicoechea, socio cofundador de AGi architects, explicou que o proxecto "integra paisaxismo, rehabilitación e musealización" e baséase no respecto á contorna natural e arqueolóxica que encerra, co fin de "dotarlle dunha entidade propia, sustentable, sinxela e, á vez, que represente unha experiencia única ao visitante".
A proposta toma como punto de partida a natureza intrínseca do programa exposto: a creación dun espazo para a preservación da memoria nun medio natural preferente e escollido como lugar habitacional hai centos de anos. Unha intervención non formal potencia a aprehensión da paisaxe natural e arqueolóxica, achegando ao observador á natureza pero tamén a ese mundo abstracto, imaxinado e proxectado. Como un museo natural, recrea a memoria da paisaxe a través do mantemento, consolidación e recuperación da vexetación autóctona perdida.
Para iso, establécese unha proposta-guía, un sistema abstracto por capas, con vontade de transferir coñecementos ad hoc para cada un dos xacementos integrándoos nunha singular rede para a interpretación da paisaxe arqueolóxica galego. Aquí figuran todos os detalles.