Con apenas 21 anos, os pontevedreses Lucas Ortins e Iago González lanzáronse a desenvolver unha plataforma web que busca dar resposta a un dos problemas máis estendidos entre os mozos: atopar con quen compartir piso sen que a convivencia se converta nun problema.
A idea xurdiu a final deste curso. "Eu tiña que facer un traballo de fin de FP, do ciclo de Desenvolvemento de Aplicacións Web, e vendo como está o tema do aluguer en España, con tanta xente compartindo piso, ocorréuseme", explica Lucas. Comentoullo ao seu amigo da infancia, Iago, "e puxémonos con iso".
González asumiu a parte de mercadotecnia, redes sociais e anuncios. Aínda que non ten formación específica nese ámbito, recoñece que "manexamos bastante as redes e gústanos aprender".
A proposta naceu como exercicio formativo, pero non tardou en converterse nun proxecto real. "Grazas a unha materia na que aprendemos a facer estudos de mercado, vimos que podía ser viable", apunta Lucas.
En apenas dous meses, Compa, que así se chama a plataforma, xa estaba en marcha. Por agora funciona como páxina web, aínda que os seus creadores xa traballan na súa versión para o móbil.
O seu funcionamento é parecido ás aplicacións de citas, pero cun obxectivo moi distinto. "Está inspirado no modelo de 'match' de Tinder, pero aquí non podes filtrar por sexo. Non queremos que se use para ligar", aclara o seu creador.
A isto súmanse as características dos portais inmobiliarios como Idealista, xa que os usuarios poden subir anuncios de pisos con imaxes.
A clave da aplicación está en que todos os usuarios ao rexistrarse deben realizar un test de afinidade obrigatorio.
"Son 25 preguntas que che levan un cinco minutos e encádranche nunha forma de ser. A partir de aí, busca perfís compatibles contigo cun modelo baseado en criterios psicolóxicos", detalla Lucas.
Ademais, incorpora filtros relacionados con hábitos de convivencia, como non fumar, non ter mascotas ou os horarios. "Hai tres filtros e podes elixir un como prioritario, que si actúa de forma máis estrita", explican. Tamén permite axustar rango de idade e radio de procura, fixado inicialmente en 30 quilómetros.
Con esas premisas, e a raiz de numerosas experiencias próximas, naceu esta iniciativa. "Temos compañeiros estudando fose que tiñan moitos problemas para atopar piso ou xente coa que encaixar. Estaban en grupos, pero non sabían con quen ían convivir realmente", apunta Lucas. "Ao final non sabes si vas conectar con esa persoa, e cremos que con este sistema é moito máis fácil", sinalan.
Fronte ás posibles dúbidas que poden xurdir sobre a fiabilidade deste tipo de ferramentas, os seus creadores son claros: "nunha enquisa normal a xente pode mentir, pero aquí é moito máis difícil porque son preguntas que non teñen unha única resposta. Probeino con xente da miña familia e o nivel de acerto é moi alto", asegura Lucas.
Pese ao potencial que ten a plataforma, o principal reto actualmente é despegar. "Este tipo de plataformas necesita volume. Se só hai tres persoas, non funciona, como pasaría con calquera aplicación similar", admite Iago.
Actualmente contan con nove usuarios e márcanse como primeiro obxectivo "uns 50, así xa empezaría a moverse mellor".
O acceso é principalmente gratuíto, xa que "non está enfocada a facer diñeiro, senón a axudar", subliñan. Aínda así, contan cun modelo premium opcional por 7,99 euros á semana ou 24,99 ao mes. Pagando ese prezo "podes ter vantaxes como máis visibilidade ou axudas para iniciar a conversación, pero o funcionamento básico é gratis", aseguran.
O proxecto preséntase baixo o nome de Compa, aínda que o dominio web dispoñible é compahub.es.
Agora, mentres avanzan no desenvolvemento da aplicación móbil, ambos confían en que a súa proposta conecte con quen buscan algo convivir nas mellores condicións posibles.
Engade Pontevedra Viva como fonte preferida de Google de balde
Mantente informado coas últimas noticias de actualidade.