O menor de 16 anos detido na noite deste mércores na zona do paseo dos Gafos é sospeitoso de tres delitos de agresión sexual, dous deles a dúas mozas que facían deporte xuntas pola zona e o terceiro a unha moza que estaba a uns metros de distancia e da que, nun principio, considerábase que podería ser testemuña. Fontes policiais e xudiciais confirmaron que as tres están consideradas vítimas e que se trata de agresións sexuais confirmadas e non só tentativas.
Tal e como adiantou PontevedraViva, o menor foi detido sobre as 21.15 horas deste mércores na zona do paseo de madeira dos Gafos situada entre Alcalde Hevia e o centro de menores Avelino Montero. As tres agresións producíronse na contorna mentres as vítimas practicaban deporte e o mozo foi detido nas inmediacións grazas á actuación dun axente da Policía Nacional que estaba fóra de servizo e a varias testemuñas.
Segundo transcendeu nas últimas horas, o mozo non é veciño de Pontevedra, senón doutro concello da provincia. As tres presuntas vítimas si son veciñas da cidade, aínda que unha ten orixe estranxeira. Teñen entre 20 e 30 anos e as tres relataron que foron vítimas de agresións tras ser abordadas por detrás polo mozo agora detido.
Dous delas corrían xuntas e sufriron tocamentos e outro tipo de abusos, feitos que están cualificados como agresión. Entre ambas as dúas conseguiron defenderse e liberarse do seu agresor, pero sufriron rabuñadas e outras lesións. A terceira foi presuntamente asaltada xusto despois e agredida sexualmente, ata que empezou a gritar e pedir axuda e o agresor saíu correndo.
Alertado polos berros, un policía fora de servizo que tamén practicaba deporte pola zona saíu correndo detrás e, con axuda doutro individuo, conseguiu darlle alcance. Retívoo e xusto nese momento chegou unha patrulla policial que fora alertada. O mozo foi detido e trasladado á Comisaría Provincial, onde se practicaron dilixencias policiais e avisouse aos pais do menor. Posteriormente, foi trasladado á Comisaría de Marín, onde pasou a noite á espera de que sexa posto a disposición xudicial ao longo da tarde deste xoves.
A Policía Nacional investiga os feitos e tamén a posibilidade de que se produciron outros casos de agresións ou abusos sexuais na zona de forma recente.