Un auto emitido pola Audiencia de Pontevedra estimou xulgar como homicidio doloso a morte do oftalmólogo coruñés, Juan Manuel Tábara Rodríguez, en abril de 2022, en Sanxenxo, tras ser golpeado por unha embarcación cando nadaba na praia de Silgar.
Deste xeito a Audiencia de Pontevedra asume as formulacións dos recursos de apelación presentados polas partes personadas na causa fronte á decisión do Xulgado de Instrución número 3 de Cambados que, en agosto de 2024, acordara seguir a tramitación como delito de homicidio imprudente.
O homicidio doloso leva penas de cárcere de 10 a 15 anos, reducibles ou prolongables por atenuantes ou agravantes, mentres que, no caso de imprudencia grave a pena base de prisión é de 1 a 4 anos e con multa de 3 a 18 meses en caso de ser imprudencia menos grave.
O falecido, de 59 anos de idade, morreu tras ser golpeado por unha embarcación mentres nadaba no mar xunto a outra persoa, que resultou ilesa.
As partes tamén solicitaron que a causa sexa xulgada polo Tribunal de Xurado.