Últimos trámites para que o proxecto para que o río Gafos deixe de estar cuberto, ao seu paso polo barrio de Campolongo, poida ser unha realidade palpable. Augas de Galicia informou favorablemente a esta intervención e autoriza os traballos na canle fluvial e nas súas ribeiras.
Así o anunciou o edil responsable desta actuación, César Mosquera, que agradeceu que os técnicos do organismo autonómico foran "moi áxiles" en emitir o seu informe sobre este proxecto. A autorización formal chegará ao Concello de maneira "inminente".
Mosquera revelou que a "propia conselleira", a titular de Medio Ambiente e Cambio Climático, Ángeles Vázquez, "preocupouse de que fora o máis rápido posible" e foi quen comunicou ao alcalde vía telefónica a concesión desta autorización.
A licitación desta obra, que ascenderá aos 4,6 millóns de euros, será posible cando esta autorización se remita de maneira formal e cando a Fundación Biodiversidade, que xa estuda os pregos do proxecto, financiado con fondos europeos, tamén dea o seu visto bo.
O goberno municipal confía en que esta actuación poida estar adxudicada antes de final de ano, segundo expresou o responsable da área municipal de obras e infraestruturas. Terá un prazo de execución de doce meses.
Con respecto á posibilidade de estender este proxecto de renaturalización da canle do Gafos até a súa desembocadura, como acordaron BNG e PSOE, César Mosquera indicou que "está ben que se dean pasos" nese sentido, aínda que recoñeceu que é "complicado".
"Non o vexo no horizonte duns cantos anos", recoñeceu Mosquera, a preguntas dos xornalistas, reiterando que "agora pegamos un gran salto" en Campolongo e que, con respecto ao resto, "está ben ir adiantando cousas" ao encargar un estudo sobre ese tramo final.
O concelleiro do BNG lembrou que, desde Rosalía de Castro até As Corbaceiras, "hai edificios encima do río", polo que actuar en certas zonas será "complexo". Por iso é polo que insista en que esa actuación final terá "condicionantes moi difíciles" de abordar.
Engade Pontevedra Viva como fonte preferida de Google de balde
Mantente informado coas últimas noticias de actualidade.