A Policía Local de Pontevedra detivo o pasado 21 de xullo un home como presunto autor dun delito de violencia de xénero tras, supostamente, agredir á súa parella durante unha discusión ocorrida na praza Veiga da Eira.
Segundo informou o Concello, a intervención produciuse despois de que unha chamada alertase de que unha muller estaba a ser agredida na vía pública.
Ao chegar ao lugar, os axentes entrevistáronse coa vítima, que relatou que o home se abalanzara sobre ela, inmovilizándoa e suxeitándolle a cabeza mentres lle presionaba a cara.
Os policías comprobaron que presentaba marcas compatibles co relato ofrecido.
A muller explicou tamén que non era a primeira vez que sufría unha agresión deste tipo por parte da súa parella.
Mesmo mostrou no seu teléfono móbil imaxes e outras probas relacionadas con episodios anteriores.
Tras a intervención, unha patrulla acompañou á vítima a un centro sanitario para ser atendida das lesións.
Posteriormente, manifestou a súa intención de formalizar a correspondente denuncia en dependencias policiais.
O presunto agresor foi arrestado no mesmo lugar dos feitos e posto posteriormente a disposición da autoridade xudicial.
Engade Pontevedra Viva como fonte preferida de Google de balde
Mantente informado coas últimas noticias de actualidade.