A Banda de Música en colaboración co Concello de Sanxenxo, a través da Escola Municipal, organiza para xullo e agosto o I Campus Musical 'Vila de Sanxenxo'.
Celebrarase no Auditorio Emilia Pardo Bazán en horario de 8:30 a 14:30 horas.
O campamento está dirixido a nenos, de entre 4 e 15 anos, estudantes de música de nivel elemental e medio, así como a nenos sen coñecementos musicais previos.
Os talleres musicais e as clases de instrumento serán impartidas por profesores con Titulación Superior e ampla experiencia pedagóxica.
Dentro de cada nivel, impartiranse tanto clases individuais como colectivas nun ambiente lúdico onde os participantes terán a oportunidade de converterse en compositores, directores e intérpretes.
Tamén se prevén mostras de xogos tradicionais e actividades deportivas para fomentar a interacción social.
Trátase dunha proposta cunha temática diferenciada, enfocada á música, pero sen deixar de lado os aspectos lúdicos das escolas de verán.
Ademais, a través de actividades grupales, coñecerán diferentes estilos musicais, farán manualidades, coreografías, crearán instrumentos, improvisarán ritmos e movementos, utilizando así o lecer e tempo libre dos nenos dunha forma construtiva, á vez que satisfarán as súas motivacións e intereses.
O programa dividirase por quincenas e cada unha terá unha temática diferente para dar a coñecer distintas épocas e estilos musicais: Música medieval e Renacemento, Barroco, Clasicismo e Romanticismo.
En canto ao número de prazas, haberá dispoñibles 75 por quincena, é dicir, 300 durante os dous meses.