O parque infantil da Praza de Valentín García Escudero xa recibiu a visita dos primeiros nenos que acudiron á festa infantil de inauguración á que asistiu o alcalde Miguel Anxo Fernández Lores e o concelleiro de Obras urbanas Luis Bará.
O parque conta cunha forma na que se recrea un barco intentando rememorar simbolicamente o peirao que estaba situado neste ámbito.
A asociación Taburete colaborou cos actos de apertura coa construción de tres barcos de papel de cinco metros de lonxitude. Durante a mañá estiveron instalados nos balcóns dese ámbito e durante a tarde foron lanzados ao río.
A praza de Valentín García Escudero conta agora cunha gran zona verde na que se instalaron bancos e a escavación arqueolóxica se cubriu en gran parte.