Barro pon ao dispor da Xunta os terreos para a construción dun novo centro de saúde

O pleno do Concello de Barro aprobou poñer ao dispor da Xunta de Galicia os terreos para a construción dun novo centro de saúde.

Na sesión plenaria, celebrada na tarde do mércores, a corporación aprobou esta proposta do alcalde, Xosé Manuel Fernández Abraldes, cos votos a favor do BNG e do PSOE.

O centro de saúde actual xa ten preto de corenta anos e, segundo o goberno local, "non reúne as condicións técnicas esixibles para a prestación dun servizo público esencial como é o sanitario".

Ao longo destes anos mantivéronse conversacións cos responsables da Consellería de Sanidade quen recoñeceron a necesidade dun novo Centro de Saúde para Barro e nas que o rexedor lles comunicou que o Concello tiña reservados terreos para esa finalidade.

Os terreos que se poñen a disposición da Xunta están reservados no planeamento urbanístico de Barro para a construción deste tipo de equipamentos sanitarios.

O grupo socialista apoiou esta opción, aínda que o seu portavoz, José Sanmartín, dixo que "estamos abertos a outras alternativas como a Rua do Pazo, un espazo de gran amplitude no entorno do Pazo da Crega, que, ademáis, ofrecería a oportunidade de extender o casco urbano, impulsando a construcción de novas vivendas na zona". 

No pleno tamén se aprobou unha moción conxunta do PSOE e do BNG para esixirlle á Xunta axudas inmediatas aos sectores económicos afectados polo cesamento da súa actividade forzada polas restricións aprobadas polo goberno galego e tamén para propoñer que Xunta, deputacións e concellos cren un fondo común para o impulso económico de axuda ao sector da hostalería onde cada administración achegue a mesma porcentaxe do seu orzamento.

Para a aplicación deste fondo, elaboraríanse unhas bases consensuadas entre a FEGAMP e a Xunta.

Segundo explica o portavoz socialista, José Sanmartín, "sería unha formula que emularía á administración xermana" co fin de que cada vez que se decreten medidas restrictivas e peches se estableza unha partida económica para paliar as consecuencias en hostelería, comercio, cultura, feiras ou orquestras.