Barro aprobou tres novos proxectos para financiar a cargo do Plan Concellos 2017 da Deputación que suman 100.130 euros, e que se veñen a engadir ao xa aprobado pola institución provincial de ampliación de viais en Fonte de Curro por un importe de 73.487 euros.
Estes novos proxectos consisten na mellora da seguridade e os accesos nos lugares da Madanela e o Concello da parroquia de Agudelo que ascende a 24.411 euros, a mellora da seguridade en viais en San Amaro e Lardoeira por importe de 24.621 euros e o saneamento en Fonte de Curro cun orzamento de 51.098 euros.
O goberno municipal está traballando tamén na redacción dos proxectos de saneamento dos lugares da Estación da Portela e Güimil, que rondará tamén os 50.000 euros, outro de mellora da mobilidade e a seguridade viaria por importe de 25.000 euros e a mellora do servizo no alumeado público que ascenderá a 22.000 euros.
Para completar os 324.000 euros da liña 1 do Plan Concellos 2017 está tamén en proceso de redacción un proxecto de mellora e ampliación do pavimento en varios viais municipais, que servirá para mellorar a seguridade e acceso a distintos núcleos do municipio.