Dez días antes dunha nova subida nas peaxes da AP-9, estimada en máis dun 4% a partir do próximo 1 de xaneiro, o BNG incrementou a presión para esixir ao Goberno que poña fin a estes pagos e que rescate de maneira "inmediata" a concesión.
O deputado do BNG no Congreso, Néstor Rego, encabezou este sábado un acto de protesta, ante a peaxe de Vilaboa, no que dirixentes nacionalistas reivindicaron que esta autoestrada sexa transferida a Galicia.
"É inxustificable que os galegos sigamos pagando por unha infraestrutura máis que amortizada", sostivo Rego, que lembrou que esta concesión, que debería terminar fai xa 12 anos, foi declarada ilegal pola Unión Europea.
O Goberno, segundo o deputado do BNG, debe actuar "o antes posible" para resolver a concesión da AP-9 á compañía Audasa, priorizando así os intereses dos cidadáns "fronte aos dunha empresa participada por fondos buitre".
Para Néstor Rego, é "escandaloso" que os galegos sigan pagando peaxes por circular por esta autoestrada e engadiu que "non ten ningún sentido seguir perpetuando un modelo que prexudica a mobilidade, a competitividade económica e a cohesión territorial"
En todo caso, o BNG esixe ao Goberno que adopte "medidas inmediatas" para evitar o aumento das peaxes previsto para 2026, negociando coa concesionaria ou asumindo os incrementos previstos con cargo aos Orzamentos Xerais do Estado.
"O futuro da AP-9 debe pasar por unha xestión pública, sen peaxes e ao servizo da maioría social da Galicia", defendeu Néstor Rego, que considera "importante" avanzar cara á transferencia da autoestrada á comunidade galega.
Lembrou que, actualmente, a iniciativa lexislativa aprobada por unanimidade no Parlamento galego está en tramitación no Congreso, pero o PSOE rexistrou emendas que "modifican substancialmente" o texto acordado pola Cámara galega.
Ante esta situación, o BNG reclama ao PSOE retirar as emendas presentadas e respectar a unanimidade expresada en Galicia porque, sinalou o deputado, "só así se poderá facer efectiva a transferencia da autoestrada e garantir unha xestión ao servizo do país".
