"A solidariedade da cidadanía de Pontevedra e arredores demostrou non ter límites". É o balance que realiza a asociación Boa Vida da campaña de Nadal organizada.
A entidade fai balance da campaña e sinalou que "grazas á xenerosidade de todos, cumprimos con éxito o obxectivo de recoller 7.000 xoguetes".
Finalmente, recolleron 11.500 xoguetes, dos que restauraron 8.000 para que cheguen a máis persoas a prezos solidarios e para as familias que o solicitaron.
Segundo explicaron desde a entidade, este "notable aumento" das doazóns foi resultado do seu último chamamento na rúa e a través dos medios de comunicación cando faltaban 3.250 xoguetes para alcanzar o seu obxectivo.
A través desta campaña, proporcionaron xoguetes e tamén promoveron valores como a solidariedade, a economía circular, a reutilización e o coidado do medio ambiente. "Cada xoguete que conseguimos reparar e entregar representa unha oportunidade para que os nenos e nenas disfruten dun xogo que doutro modo podería ser desbotado", destacan.
Nesta liña, desde Boa Vida consideran importante destacar que a reutilización e segunda vida dos xoguetes son posibles grazas ao traballo que realizan as persoas da empresa de inserción que teñen en marcha.
Como resultado do seu traballo, todo o recadado destinarase a manter os gastos actuais e seguir ampliando os servizos de formación, emprego e solidariedade, de tal maneira que "permitirá chegar a máis persoas en risco de exclusión".
Desde a entidade pontevedresa amosan o seu "especial agradecemento" ás 38 institucións que colaboraron cos puntos de recollida e ás 369 persoas que entregaron xoguetes nas tendas.
Dado que a labor solidaria non remata co Nadal, continúan con accións permanentes como as campañas dos mércores a metade de prezo e os xoguetes ao 50% até o 18 de xaneiro.