'Bruschetta' ao atún Pescamar con tomate e beicon

Chegamos a unha nova entrega de "A cociña gourmet en conserva" cunha deliciosa receita da cociña italiana: a bruschetta. Este prato orixinario da zona central e sur de Italia é un dos entrantes máis populares. O seu nome provén da palabra italiana "bruscare", que significa "asar sobre brasas", que é a forma na que se prepara o pan, tostado sobre unha grella, que é a base deste prato. Unha vez tostado, úntase con aceite de oliva e allo. Sobre esta base, engádense outros ingredientes ao gusto.

Conservas Pescamar propón unha bruschetta moi especial, grazas ao sabor dun do seus produtos máis prezados: o atún claro. O atún é un peixe con múltiples propiedades. Destaca a súa achega en proteínas, superior ao dalgunhas carnes. O seu alto contido en Omega-3 beneficia a saúde do corazón e regula os niveis de colesterol e triglicéridos. A estas importantes calidades, hai que engadir os beneficios da súa presentación en aceite de oliva, que ademais contribúe a potenciar o seu sabor.

Para preparar uunha deliciosa 'Bruschetta' ao atún Pescamar con tomate e beicon necesitamos os seguintes ingredientes:

- 6 rebandas grosas de pan

- 1 lata de atún claro en aceite de oliva Pescamar

- aceite de oliva virxe extra

- 1 dente de allo

- sal

- 6 liscos finos de beicon afumado

- queixo mozarella

- eiruga

- Para a salsa de tomate:

   - 1 cullerada de aceite de oliva virxe extra

   - 1 cebola pequena

   - 1 dente de allo

   - 2 tomates maduros

   - Ourego ou alfábega fresca

   - Sal

   - Pementa negra

Preparación:

Procedemos a preparar a salsa de tomate. Na tixola poñemos o aceite de oliva a quentar. A lume medio, engadimos a cebola picada. Cando comece a facerse, incorporamos os dous dentes de allo cortados moi finos e fritimos dous minutos. Namentres, pelamos os tomates, retirámoslles a polpa e picámolos. Engadimos á tixola e deixamos cociñar a mestura a lume lento durante 25 minutos. Remexemos suavemente ata que se forme unha salsa espesa. Rectificamos de sal e engadimos o ourego ou a alfábega, previamente picados, ou unha mestura das dúas herbas, segundo o noso gusto, e a pementa negra. Mesturamos co atún claro en aceite de oliva Pescamar, previamente escorrido. Reservamos.

Tostamos as rebandas de pan nunha grella. A continuación, untámolas co aceite de oliva e o dente de allo. Salgamos.

Sobre cada rebanda poñemos unha parte da mestura de salsa de tomate e atún, cubrimos cun lisco de beicon e unha porción de queixo. Volvemos colocala sobre as brasas ata que o queixo se funda. Retiramos e colocamos unha folla de eiruga e se se desexa algunha das especias sobrantes.

En dúas semanas, os produtos do mar serán de novo protagonistas dunha nova receita de "A cociña gourmet en conserva" de Conservas Pescamar.