O alcalde de Bueu, Félix Juncal, e a concelleira de promoción económica e turismo, Silvia Carballo, mantiveron este luns unha reunión con Rodrigo Pastoriza, o xerente da Federación de Comerciantes e Industriais do Morrazo, e Pablo Pazos, o presidente da Asociación de Empresarios de Castiñeiras.
Neste encontro, os representantes do sector empresarial expuxeron as súas demandas sobre as actuacións que consideran necesarias para o parque empresarial de Castiñeiras.
O goberno local comprometeuse a estudar estas obras de mellora durante os próximos meses con vistas a poder implementalas.
A edil de promoción económica adianta que "a idea é continuar coa ampliación da sinalización e crear unha bolsa de aparcadoiro público nunha das parcelas municipais, ademais de crear zonas verdes".
Estas actuacións únense ás que o Concello leva acometido neste espazo nos últimos anos. En concreto, en Castiñeiras melloráronse as beirarrúas nun treito de máis de dous quilómetros, instalouse iluminación LED e axardináronse as rotondas, entre outras actuacións.