O Concello de Caldas de Reis está inmerso estes días no acondicionamento do Camiño Portugués a Santiago ao seu paso por este municipio. Estes traballos forman parte de dúas iniciativas, a campaña #MiPuebloSinBasuraleza da Federación Española de Municipios e Provincias que colabora ademais co proxecto Libera de SEO/ BirdLife e Ecoembes. O obxectivo é poñer en valor as contornas naturais e rurais, animando a facer un turismo responsable.
A limpeza, roza e acondicionamento comezaron pola Capela de Santa Lucía, en Arcos da Condesa e continuarán polo trazado xacobeo ata o límite co municipio de Valga. Actúase nas contornas dos principais bens e recursos patrimoniais que se atopan no Camiño Portugués, así como no propio trazado do roteiro, onde resultan necesarios arranxos.
"Trátase dunha iniciativa coa que pretendemos poñer en valor o percorrido do Camiño Portugués polo noso concello e ofrecer o seu máximo atractivo aos peregrinos que nesta época transcorren por este roteiro", explicou o concelleiro delegado de Medio Amiente e Obras, Manuel González, engadindo que "é un sinal de identidade para Caldas debido a que se converteu nun dos principais eixos dinamizadores da nosa economía".
Esta non é a única limpeza de espazos públicos que está a realizar o Concello xa que tamén está a realizar tarefas similares noutros espazos do centro urbano como das zonas rurais "de modo que se favoreza a conservación da biodiversidade e mellórese a calidade de vida dos veciños".