O Concello de Poio confecciona unha lista dos negocios e establecementos do municipio que se manteñen abertos durante a corentena. Trátase de locais que ofrecen servizos de primeira necesidade.
O departamento de Promoción Económica púxose en contacto cos responsables destas empresas para realizar a base de datos que será exposta na páxina web do Concello e nas redes sociais.
Está prevista tamén a elaboración dun mapa interactivo para coñecer o emprazamento de cada negocio, ademais das direccións e horarios de apertura dos establecementos que realizan actividades vinculadas ao sector alimentario, quioscos, estancos, gasolineiras, supermercados, farmacias, clínicas veterinarias e outros locais que ofrecen servizos necesarios para a cidadanía durante o confinamento.
Tamén se especificará que comercios locais ofrecen servizo a domicilio. A listaxe permanecerá aberta e poderanse ir sumando negocios ou prestacións.
O Concello leva varios días repartindo máscaras e material de protección entre estes profesionais coa intención de reforzar as medidas de seguridade no seu traballo de atención ao público. Tamén se achegou material aos mariscadores á boia.
Esta medida tratábase na xunta de voceiros, que se celebraba este mércores. Durante este encontro que se realizou de maneira virtual, o Partido Popular a través de Ángel Moldes solicitou a creación dun servizo de axuda aos escolares para imprimir e repartir as tarefas do colexio e a continuación da actividade dos órganos municipais representativos coa celebración de sesións telemáticas.