A Asociación de Nais e Pais de Alumnos do CEIP Plurilingüe de Rubiáns iniciou unha campaña de pegada de cartaces polos comercios e locais hostaleiros de Vilagarcía de Arousa para visibilizar a problemática que afecta ao centro educativo desde hai case dúas décadas.
A iniciativa conta coa colaboración da asociación Zona Aberta, que decidiu apoiar a causa tras coñecer a situación que atravesa o colexio. Os cartaces colocaranse en diferentes establecementos do municipio como sinal de apoio ás reivindicacións das familias.
A ANPA denuncia que leva cinco meses sen recibir resposta por parte da Xunta de Galicia ás súas peticións, a pesar de ter realizado varias mobilizacións e presentado múltiples instancias.
A situación xurdiu cando se coñeceu a próxima expiración da licitación coa empresa actual de transportes, momento que as familias consideraron "acaido" para resolver o conflito.
"O que pedimos é ben doado de entender: un horario xusto e unha xornada lectiva digna para as nosas fillas e fillos", explican desde a asociación de pais e nais, que considera que o problema "ten fácil solución".
As mobilizacións levadas a cabo pola ANPA recadaron o apoio de diversos sectores da cidade, incluíndo o concello, partidos políticos e outros colectivos.
A ANPA anima a outras persoas que queiran sumarse á iniciativa a que se poñan en contacto a través das súas redes sociais.