Dende o día 23 de abril e ata o día 6 de maio, a Policía Local de Poio está levando a cabo unha campaña de control dos estacionamentos nas prazas reservadas para persoas con mobilidade reducida. O obxectivo está sendo o de velar o uso axeitado dos espazos de estacionamento reservados para estas persoas, delimitados e sinalizados correctamente. Con esta medida trátase de evitar o uso impropio e fraudulento de tarxetas concedidas así como os actos irresponsables por parte dos cidadáns.
No ano 2017 a Policía Local identificou tres casos de persoas que utilizaban tarxetas de familiares falecidos, polo que procedeu a investigar aos identificados por un presunto delito de falsidade documental e uso fraudulento. Tamén se denunciaron seis casos por uso indebido, familiares que teñen alguén con algunha discapacidade funcional, e aprovéitanse da tarxeta para facer recados, estacionando os vehículos sen estar presente a persoa autorizada.
A Policía Local de Poio pretende concienciar aos veciños sobre o uso debido de estas prazas reservadas para facilitar o estacionamento as persoas con discapacidade ou que presentan unha mobilidade reducida, respectando así os seus dereitos. Polo que é necesario sensibilizarse cos veciños que presentan estas necesidades e conseguir entre todos que os espazos sinalizados para tal fin estean dispoñibles para eles.
A Policía Local de Poio agarda reducir o número de sancións realizadas por ocupar as prazas sen tarxeta, que o ano pasado ascenderon a un total de 74 denuncias.