As Rías Baixas queren xogar en primeira división do turismo deportivo en 2026. A Deputación de Pontevedra presentou a nova campaña de promoción do destino, que por primeira vez pon o foco no deporte como fío condutor.
Baixo o lema "Rías Baixas, a túa meta, o teu destino", a provincia preséntase como un auténtico polideportivo ao aire libre, aberto os 365 días do ano e pensado tanto para afeccionados como para deportistas profesionais.
O presidente provincial, Luis López, explicou no Pazo Los Escudos que o deporte é unha ferramenta fundamental para avanzar cara a un turismo máis sostible, de calidade e sen masificacións.
"Axúdanos a desestacionalizar, a mellorar a experiencia e a repartir mellor os fluxos de visitantes", sinalou, nun acto que contou coa vicepresidenta e deputada de Deportes, Luisa Sánchez, o deputado de Turismo, Jesús Vázquez Almuíña, e representantes do sector.
Por segundo ano consecutivo, a Deputación decidiu estrear a campaña "na casa" antes de levala a Fitur. Fíxoo cun formato rompedor, concibindo o destino como se fose unha carreira deportiva: con saída, percorrido, equipo e meta.
"Hai Rías Baixas para camiñar, correr, pedalear, nadar, navegar, saborear e volver. Dá igual cando veñas: este é o teu destino", resumiu López, bufanda das Rías Baixas na man.
A gala, conducida pola actriz Marta Larralde, incluíu a proxección de vídeos promocionais e conversas sobre a cultura deportiva da provincia.
Luisa Sánchez destacou que Pontevedra acolle máis de 500 eventos deportivos ao ano e avanzou citas de primeiro nivel para 2026, como probas internacionais de natación artística, ciclismo ou tríatlon, cun claro impacto no turismo.
Desde o punto de vista económico, Jesús Vázquez Almuíña lembrou que as Rías Baixas lideran a ocupación hoteleira en Galicia, están entre os dez mellores destinos da España verde e contan cunha crecente presenza de visitantes estranxeiros. "Temos natureza, clima, gastronomía e eventos: en turismo deportivo témolo todo", afirmou.
O peche correu a cargo de Luis López, que reivindicou a hospitalidade da veciñanza e a necesidade de apostar por un turismo equilibrado.
"O deporte é a porta de entrada, pero o importante é o que ofrecemos detrás", concluíu.